Kominn tími á breytingar

Oft hafa komið fram tillögur um að gefa áfengissölu frjálsa og að við getum nálgast áfengið út í næstu búð, svona sambærilegt og við mörg getum sem búum erlendis. Hér í Lúx fer ég út í matvörubúð og kaupi í matinn og get keypt vín eða bjór með ef mér sýnist. Ég hef ekki tekið eftir einhverjum drykkjulátum í borginni þrátt fyrir þetta. Ég hef að vísu tekið eftir að ég nota mun meira áfengi hér úti en ég gerði heima. Munurinn er bara að heima var maður að drekka meira um helgar og þá ekki oft - aldrei verið mikið á djamminu - en hér úti er maður oft á fá sér einn til tvo bjóra. Ekki drekkur maður sig fullann og almennt séð eru flestir sem ég þekki hér úti þannig. Auðvitað fara menn einstaka sinnum á fyllerí en það er ekki það sem sést á áberandi hátt á fólki, heldur frekar á einstaka mönnum. 

Hvernig sölu á áfengi er háttað er angi af stefnu í áfengismálum. Ekki er hægt að segja að sú stefna sem rekin hefur verið á undanförnum árum hafi skilað miklum árangri. Er ekki þörf á að fara aðrar leiðir? T.d.

1. Leyfa sölu á léttvíni og bjór í matvöruverslunum að uppfylltum ákveðnum skilyrðum með skýrum refsiákvæðum þ.e. varðandi sölu til fólks undir 20 ára aldri.

2. Takmarka aðgengi að sölu á sterku áfengi t.d. vodka og viskí. Væri eingöngu fáanlegt í tiltölulega fáum verslunum ÁTVR.

Meginatriðið er að ýta fólki frá sterku áfengi yfir í léttvín og bjór. Áfengisstefnan miðist við að draga úr skaða með því að fólk drekki frekar áfengi með lægra áfengisinnihaldi og svo sé hart tekið á ölvunarakstri - eins og hingað til - og sölu til ungs fólks undir 20 ára aldri. Líklega myndi það skila árangri og líklega betri árangri en núverandi stefna um að takmarka aðgengi að öllu áfengi.

Á að gefa bjór- og léttvínssölu frjálsa?

Hverjir eru kostir Palestínumanna?

Þegar maður les fréttir af stöðu mála meðal Palestínumanna þá er ekki beint hægt að segja að maður verði uppfullur af von um að lausn fáist í málefnum svæðisins á næstu árum. Meginvandamálið virðist vera, ef leyniþjónusta Ísraelshers fer rétt með, að í raun hafi enginn vald til að framfylgja hugsanlegum friðarsamningum og/eða geti verið trúverðugur aðili í samningum. Þetta vandamál verða Palestínumenn að leysa áður en getur komið til stofnunar sjálfstæðs ríkis, en það er líklega eina raunhæfa langtímalausnin á málinu. En hverjir eru þá kostir Palestínumanna í stöðunni? Hér eru nokkrir:

1. Koma Hamas til valda á Vesturbakkanum. Hamas yrði líklega nógu sterkir til að geta framfylgt hvaða samkomulagi sem þeir kæmust að með Ísrael. Ísrael mun ekki geta samið við Hamas fyrr en þeir viðurkenna Ísrael og verða tilbúnir að hætta árásum á Ísrael. Varla er þetta því líklegt til að ganga eftir.

2. Standa þétt að baki Abbas og félaga, en snúa baki við Hamas og taka þátt í að afvopna þá. Abbas getur samið við Ísrael en ekki endilega líklegt að hann geti framfylgt friðarsamningum enda hefði hann að öllum líkindum ekki nægan stuðning til að ganga gegn Hamas.

3. Óbreytt ástand - pólitísk upplausn, enginn heilstæð stjórnun og yfirráð á Palestínsku svæði. Ekki er skýrt hver getur staðið við friðarsamninga, ekki ljóst hver ræður í raun og veru. Íbúar svæðisins eru læstir milli hryðjuverkamanna og öflugs herríkis sem telur sér ógnað. Ástandið á því líklega bara eftir að versna ef fer fram sem horfir.

Auðvitað vonum við öll að málum fari að þoka áfram í friðarumleitunum en það sem sést í fréttum gefur ekki ástæðu til að vera bjartsýnn. Líklega munu íbúar svæðisins halda áfram að vera í samræmi við kost 3, þar sem Hamas o.fl. ráðast á Ísrael og Ísraelski herinn svarar fyrir sig af hörku. Það er Palestínumanna að leysa sín mál og koma svo trúverðugir til samningaviðræðna. Það er þó vonandi að staða Abbas sé ekki eins slæm og leyniþjónusta Ísraelshers telur hana vera.

Segja Abbas ekki hafa vald til að framfylgja friðarsamningum

Eru hryðjuverkasamtökin Hamas að láta undan?

Nú hafa Hamas liðar farið með völd á Gasa í krafti vopnavalds og í raun sett íbúa svæðisins í einn verra fangelsi en þeir voru í fyrir. Á sama tíma hefur Fatah stjórnað Vesturbakkanum eftir að Abbas rak Hamas úr ríkisstjórninni. Svo virðist sem Hamas sé að átta sig á vonlausri stöðu sinni og séu tilbúnir að gefa eftir stjórn á Gasa svæðinu. Það yrði gott fyrir íbúa svæðisins enda er ekki neinn möguleiki á nokkurri lausn fyrir þá svo lengi sem þeir eru undir stjórn hryðjuverkasamtaka sem hafa það að markmiði að eyða Ísrael og koma á Íslömsku ríki.

Hamas samtökin eru ekki góð fyrir Palestínumenn, þ.e. ef þeir vilja frið og sjálfstætt ríki, enda munu Ísraelar ekki gefa eftir land nema þeir hafi einhverja tryggingu fyrir að friður komist á.

Hamas til viðræðu um að láta af völdum á Gasa

Hvað hefur orðið um Hreiðar Eiríks?

Ég veit að ég hef verið í burtu í nokkra daga en nú finn ég ekki bloggið hans Hreiðars Eiríkssonar (slubbert). Þegar ég klikka á það þá er eins og það sé ekki til lengur. Gaman væri að vita hvað hefur orðið um það.

Klukk

Bara Steini bloggvinur minn klukkaði mig og nú á ég að koma með 8 játningar um hluti sem fáir vita. Ætli maður neyðist ekki til að setja inn nokkur atriði.

1. Ég hef mjög gaman að keyra hratt á hraðbrautum

2. Ég er forfallinn gæludýrasjúklingur - ef ég gæti ætti ég a.m.k. hund, kött, fiska, skjaldbökur, froska, o.m.fl. en á bara kött og fiska

3. Ég er tækjasjúklingur - er þó að verða lélegur í seinni tíð enda með 4 ára gamla tölvu

4. Ég er skjálfhentur vegna aukaverkana af flogaveikilyfjum - er með frekar vægt afbrigði sem er haldið niðri með lyfjum.

5. Hef búið í Lúxemborg í um 4 ár og skil ennþá ekki frönsku, þýsku eða lúxemborgsku - skömm að þessu

6. Ég tek virkan þátt í fagsamtökum í mínu fagi í USA, en hef ekki ennþá tekið þátt í sambærilegum samtökum hér í Evrópu

7. Ég er ferlega fljótur að gleyma sérstaklega því neikvæða.

8. Ég er hræðilega óskipulagður og skrifborðið mitt er yfirfullt af pappírum.

Ég klukka: anno, asdisomar, sigrunb, jenfo, mofi, nanna, rosin, og eggman

Skiptir það virkilega einhverju máli?

Er svo illa komið fyrir íslenskunni að þörf er á að setja ákvæði um hana í stjórnarskrá? Hvað mun það þýða í raun? Ég get ekki séð að það breyti neinu varðandi stöðu íslenskunnar í íslensku samfélagi enda er hún okkar móðurmál og hið opinbera tungumál. Ekki hafa komið upp hugmyndir, a.m.k. ekki alvarlegar, um að breyta því.  Að ýta undir þekkingu á málinu og aðstoða útlendinga við að læra málið er gott mál en er ekki best að stoppa þar? Eða bera menn ekki meiri virðingu fyrir stjórnarskránni?

Íslenskunni verður ekki viðhaldið með einhverjum lagabókstaf og að setja það í stjórnarskrá að íslenskan sé þjóðtunga Íslendinga er að mínu mati tákn um vanmáttarkennd okkar gagnvart okkar ágæta tungumáli. Gaman væri að vita hvort aðrar þjóðir hafa farið þessa leið og þá hverjar.

Samhljómur um að ákvæði um íslensku verði sett í stjórnarskrá

Já var það ekki

Hvað er þetta með Pútín og félaga úr KGB? Þeir virðast sjá óvini í hverju skúmaskoti eða þurfa þeir bara svona mikið á óvini að halda? Það er alþekkt aðferð við að draga athygli íbúa lands frá vanhæfni eigin yfirvalda með því að "búa til" óvin utan frá. Gott dæmi er Norður Kórea þar sem íbúar hafa þurft að þola hungursneyð í langan tíma án þess að rísa upp gegn stjórninni, enda mjög voldugur óvinur gegn þeim.

En hvað ættu vestræn ríki að hafa uppúr því að valda upplausn í Rússlandi? Til að hafa óstöðugt Rússland með mikið safn af kjarnorkuvopnum sem gætu þá lent í höndum óæskilegra manna? Þjónar það virkilega hagsmunum vesturveldanna að draga úr stöðugleika í Rússlandi, eða er kannski um eitthvað allt annað að ræða? Mér þykir það mun líklegra heldur en að það sé eitthvað stórsamsæri gegn yfirvöldum í Kreml.

Getur kannski verið að Rússar séu eitthvað fúlir út í Breta fyrir eitthvað?

Vestrænir njósnarar sakaðir um að reyna valda upplausn í Rússlandi

Góð stefna hjá USA o.fl. sem gerist ekki nógu oft

Það er alltaf gaman þegar koma fram yfirlýsingar frá Bandaríkjamönnum varðandi Búrma þar sem þeir hafa haft skýra afstöðu og rétta afstöðu til málsins. En þeir hafa ekki verið þeir einu, flest ríki hafa í raun gert það sama og nú er Búrma svotil einangrað. Það er skylda okkar sem búum við lýðræði að veita a.m.k. móralskan stuðning við hugrakka íbúa Búrma sem hafa sýnt styrk sinn á móti alefli hersins.

Herforingjastjórnin er komin í stöðu sem er erfið, enda hafa þeir ráðist gegn munkunum í landinu með hörku og það getur ekki verið vænlegt til framtíðar í landi þar sem munkarnir njóta mikillar virðingar. Líklega mun það grafa frekar undan valdi herforingjastjórnarinnar ef almenningur fer að átta sig á því að þeir bera ekki virðingu fyrir neinu nema völdum og að stjórnin er tilbúin að gera allt til að halda völdum jafnvel ganga gegn munkunum. Allt ýtir þetta frekar undir andstöðu í landinu og ólíkt fyrri mótmælum þá veit a.m.k. stór hluti almennings um atburðina sem hafa átt sér stað undanfarið.

Laura Bush vill að herforingjastjórnin í Búrma víki

Góður úrskurður

Það er gott að sjá þessa frétt enda ekki oft sem koma svo jákvæðar fréttir frá bandaríska stjórnkerfinu þegar kemur að Guantanamo. Eitt er slæm meðferð sem fangarnir fá líklega í Guantanamo fangelsinu en annað er að senda viðkomandi til landa sem vitað er að beiti pyntingum sem reglulegum starfsaðferðum. Að framselja fanga til þannig landa getur ekki talist réttlætanlegt á nokkurn hátt og því er ástæða að fagna þessum úrskurði. Með honum er stigið skref gegn þeim starfsháttum sem Bandarísk stjórnvöld hafa beitt á undanförnum árum.

Hið svokallaða stríð gegn hryðjuverkum verður eingöngu unnið ef að við getum sýnt þann siðferðilega styrk að tekið sé eftir að í lýðræðisríkjum vesturlanda sé ekki notast við sömu aðferðir/aðferðafræði og einræðisríki nota. Ýta þarf undir frelsi borgarana og ef að þörf er á að taka frelsi okkar til að vinna þetta stríð þá höfum við þegar tapað því. Stríð Íslamista gegn vesturlöndum og öðrum er ekki eitt stríð eða fyrirbæri. Stuðningur við Íslamista kemur frá fólki úr ýmsum áttum og oftast er það kúgun heima fyrir sem ýtir undir að fólk sem er endilega ekki svo trúað gengur til liðs beint eða óbeint við þessa öfgahópa.

Á undanförnum árum hafa mál þokast í verri átt á vesturlöndum almennt séð. Við höfum látið óttann stjórna okkur og gefið eftir of mikið af okkar frelsi. Á sama tíma virðist lítill árangur vera að nást í stríðinu gegn hryðjuverkum. Er ekki þörf á að hugsa um nýjar leiðir, eitthvað annað en að takmarka svo mikið frelsi okkar, sem tók aldir að byggja upp.

Bandarískur dómari bannar framsal á fanga frá Guantanamo

Og svo segja sumir að hann sé ...

... ekki klikk. Maður sem aftur og aftur talar um að eyða Ísrael, hefur efasemdir um að helförin hafi átt sér stað og margt fleira. Er honum og klerkayfirmönnum hans treystandi fyrir kjarnorkuvopnum? Eða er allt í lagi að hann reyni að verða sér út um þau af því að hann er erfiður fyrir Bandaríkjamenn og önnur valdamestu ríki í heiminum? Stundum mætti lesa það útúr ummælum margra vinstrimanna. Það sást vel á blogginu nýverið þegar gagnrýni á þennan vitfirring var talin vera ókurteisi.

Íranar hafa sýnt ítrekað að þeir vilja eignast kjarnorkuvopn enda hafnað boði frá Rússum til að sjá kjarnorkuverum þeirra fyrir nauðsynlegum efnum til að halda þeim gangandi svo að Íranar þurfi ekki að standa sjálfir í auðgun úrans. Nei þeir vilja það sjálfir og því er erfitt að sjá neitt annað útúr þessum plönum þeirra en að tilgangurinn sé að koma sér upp kjarnorkuvopnum.

Þeir standa líka í svotil stanslausum hernaði - í gegnum hryðjuverkasamtök sem eru að stærstum hluta styrkt fjárhagslega og með vopnum af Íran - gegn Ísrael. Varla er hægt að segja að stjórnvöld í Íran séu líkleg til að ýta undir frið á svæðinu. Þó að þeir hafi ekki farið með eigin her að fyrra bragði í stríð þá eru þeir að há opið stríð í gegnum aðra, svona svipað og stórveldin gerðu í kalda stríðinu. 

Ahmadinejad vill frelsa „gervalla Palestínu“