Skiptir það virkilega einhverju máli?

Er svo illa komið fyrir íslenskunni að þörf er á að setja ákvæði um hana í stjórnarskrá? Hvað mun það þýða í raun? Ég get ekki séð að það breyti neinu varðandi stöðu íslenskunnar í íslensku samfélagi enda er hún okkar móðurmál og hið opinbera tungumál. Ekki hafa komið upp hugmyndir, a.m.k. ekki alvarlegar, um að breyta því.  Að ýta undir þekkingu á málinu og aðstoða útlendinga við að læra málið er gott mál en er ekki best að stoppa þar? Eða bera menn ekki meiri virðingu fyrir stjórnarskránni?

Íslenskunni verður ekki viðhaldið með einhverjum lagabókstaf og að setja það í stjórnarskrá að íslenskan sé þjóðtunga Íslendinga er að mínu mati tákn um vanmáttarkennd okkar gagnvart okkar ágæta tungumáli. Gaman væri að vita hvort aðrar þjóðir hafa farið þessa leið og þá hverjar.

Samhljómur um að ákvæði um íslensku verði sett í stjórnarskrá

Athugasemdir

[Þarfagreinir, 10.10.2007 kl. 15:50]

Ég veit ekki til þess að algengt sé að binda þjóðtungur í stjórnarskrá, enda hefur það frekar lítið praktískt gildi, eins og þú bendir réttilega á.

[Ellert Smári Kristbergsson, 10.10.2007 kl. 15:57]

 

Ég held að aðal málið sé ekki að banna fólki að tjá sig á öðrum tungumálum en Íslensku. Heldur sé hér málið að skýrslur og önnur gögn sem fyrirtæki senda frá sér verði aðgengileg á íslensku líka.

Það er farið að vera frekar alvarlegt mál hér á klakanum hvað fólk er farið að nota enskuna mikið. Sem dæmi má nefna alþjóðlegu kvikmyndahátíðina sem er nýliðin. En þar voru titlar kvikmyndanna þýddir yfir á ensku og hengdir upp á vegg í Regnboganum. Þó mátti hvergi sjá sambærilegt veggspjald með titlunum á frummálunum eða Íslensku.

[Daði Einarsson, 10.10.2007 kl. 16:23]

Ellert, er þetta ekki orðið menningarlegt vandamál þegar kemur að kvikmyndahúsum að notast er við enska titla og kvikmyndir sem eru ekki á ensku (íslenskar og frá öðrum málsvæðum en því enska) eru að nota enska titla eða á íslandi sé verið að nota enska þýðingu á titli viðkomandi myndar? Annað mál er líka að þýðingar eru mjög oft slæmar. Spurningin er aftur á móti hvað eigi að gera í málinu. Mun það að hafa ákvæði í stjórnarskrá breyta einhverju? Mun lagasetning með þvingunar- og refsiákvæðum breyta einhverju? Ég stórefast um það.

[Jón Gunnar Ásbjörnsson 10.10.2007 kl. 17:52]

Ég er sammála Daða og Þarfagreini. Ég sé ekki hvaða tilgangi þetta tilætlaða stjórnarskrárákvæði á að þjóna.