Jákvæð þróun mála

Nú eru blikur á lofti að leiðtogar Kóreuríkjanna muni eiga viðræður síðar í mánuðinum. Þetta er vissulega jákvætt skref og ekki er vanþörf á enda ríkt nokkuð mikil spenna á skaganum og svæðinu í kring um nokkurt skeið. Nýlegt samkomulag varðandi kjarnorkuáætlun norðanmanna hefur örugglega haft jákvæð áhrif á samskipti ríkjanna. Í málefnum Kóreu er mikilvægt að ná niðurstöðu og a.m.k. koma á friðarsamkomulagi en ekki bara vopnahléi. Formlega er eingöngu vopnahlé milli Norður og Suður Kóreu síðan stríði milli ríkjanna lauk 1953. Í deilum Norður-Kóreu við umheiminn á undanförnum árum hefur berlega komið í ljós að ekki dugar mikið að einangra landið. Líklegra til árangurs er að ná að opna landið með auknum samskiptum við það og vonandi í framhaldinu bæta hag fólks í landinu. Sérstaklega ef vel tekst til með aukið samstarf á sviði efnahagsmála.

Nú er bara að vona að þetta skref sé upphafið að ferli sem mun ljúka þeim átökum sem hófust með skiptingu Kóreuskagans 1945. Aldrei að vita nema að einhvern daginn verði talað um Kóreu en ekki suður eða norður, svipað og nú er talað um Þýskaland en ekki austur og vestur. Eða er maður kannski að vonast til of mikils?

Fundur leiðtoga Kóreuríkjanna boðaður