Klukk

Bara Steini bloggvinur minn klukkaði mig og nú á ég að koma með 8 játningar um hluti sem fáir vita. Ætli maður neyðist ekki til að setja inn nokkur atriði.

1. Ég hef mjög gaman að keyra hratt á hraðbrautum

2. Ég er forfallinn gæludýrasjúklingur - ef ég gæti ætti ég a.m.k. hund, kött, fiska, skjaldbökur, froska, o.m.fl. en á bara kött og fiska

3. Ég er tækjasjúklingur - er þó að verða lélegur í seinni tíð enda með 4 ára gamla tölvu

4. Ég er skjálfhentur vegna aukaverkana af flogaveikilyfjum - er með frekar vægt afbrigði sem er haldið niðri með lyfjum.

5. Hef búið í Lúxemborg í um 4 ár og skil ennþá ekki frönsku, þýsku eða lúxemborgsku - skömm að þessu

6. Ég tek virkan þátt í fagsamtökum í mínu fagi í USA, en hef ekki ennþá tekið þátt í sambærilegum samtökum hér í Evrópu

7. Ég er ferlega fljótur að gleyma sérstaklega því neikvæða.

8. Ég er hræðilega óskipulagður og skrifborðið mitt er yfirfullt af pappírum.

Ég klukka: anno, asdisomar, sigrunb, jenfo, mofi, nanna, rosin, og eggman

Búlgaríuferð og veikindi

Nokkuð er síðan ég bloggaði síðast en á föstudag fór ég til Búlgaríu og kom til baka á mánudagskvöldið. Allur undirbúningur fyrir brúðkaupið gengur vel og við vorum nú að senda út boðskortin. Það eru bara nokkur smáatriði eftir í undirbúningnum.

Morguninn eftir að ég kom aftur til Lúx, þ.e. í gærmorgun var ég kominn með hita og verki í kviðinn. Fór til læknis í gær og hitinn hefur farið niður en ljóst er að ég er með einhverja sýkingu. Ég mun fara aftur á morgun til læknis þar sem núverandi meðferð er ekki að virka eins og hún á að gera. 

Frábær Churchill

Stundum rekst maður á frábærar tilvitnanir og þar sem ég vinn að lýðheilsumálum þá fannst mér þessi helv... góð.

 "An apple a day keeps the doctor away... if you aim well!"
(W. Churchill)

Af hverju var þeim hleypt inn?

Íslensk stundvísi alveg frábær og kemur ekki á óvar. En af hverju var þeim sem komu seint hleypt inn? Á tónleikum sinfóníunnar þá ef maður kemur of seint þá þarf maður að bíða þangað til fyrsta hluta af tónlistinni sé lokið. Á tónleikum sem þessum væri það eina vitið og kannski myndi það kenna fólki að mæta á réttum tíma - eða er það kannski til of mikils ætlast?

Óstundvísir Íslendingar spilltu tónleikum

Að loka fljótt fyrir umræðu

Þó að nú sé föstudagur og maður ætti að vera happy að helgin sé framundan, þá ætla ég að fá að pirrast aðeins. Einstaka bloggarar fara einstaklega mikið í taugarnar á mér. Nei það er ekki vegna skoðana þeirra eða hvernig þeir skrifa. Það sem fer í taugarnar á mér þegar viðkomandi lokar fljótt á umræðu, mætti halda að þeir séu hræddir við umræður. Í gær skrifaði Jón Valur Jensson færslu vitnandi í Gabriel Stein, aðalhagfræðing Lombard Street-rannsóknarsetursins um hvað við Íslendingar mættum eiga von á ef við gengjum inn í ESB. Að mínu mati byggðu ummæli Stein og grein Jóns Vals og fleiri ESB andstæðinga á nokkrum misskilningi. Ég kommentaði því þar en hafði ekki tíma til að koma inn fyrr en nú í morgun og þá hefur Jón Valur þegar lokað á umræðuna. Ég skil að menn vilji ekki fá komment inn endalaust við gamlar greinar, en að leyfa ekki komment í svo mikið sem a.m.k. í meira en 1 dag er skrítið. Mætti halda að honum sé illa við umræður um pistla sína.

Dýr vottorð á Íslandi eða bara svona ódýr í Lúx?

Nú er undirbúningur í fullum gangi fyrir brúðkaupið mitt sem fram fer í Sofíu í Búlgaríu Nóvember. Sem hluti af undirbúningnum er að afla þeirra vottorða sem þörf er. Þar sem ég hef búið í Lúx núna í bráðlega 4 ár þá þurfti ég vottorð um hjúskaparstöðu mína bæði frá Íslandi og Lúxemborg. Vottorðið kostaði hjá Þjóðskrá 800 krónur eða tæpar 9 evrur. Sama vottorð í Lúx kostaði 2 evrur. Svo þurfti auðvitað alþjóðlega vottun vottorðunum þ.e. apostille sem utanríkisráðuneyti landana sjá um. Hér í Lúx borgaði ég heila evru fyrir það. Með öllu þá borgaði ég fyrir vottorðið og vottun á því um 1/3 af því sem vottorðið eitt kostaði heima á fróni. Er ekki spurning um að vottorðin heima verði lækkuð í verði? Eða eru þau bara virkilega ódýr hér í Lúx? Ekki það að þessi kostnaður vaxi manni í augum en það er bara spurning hvort að þessi þjónustugjöld á Íslandi séu of há miðað við þjónustuna sem er veitt. 

Þörf ábending

Miðað við fréttina þá er ljóst að endalausar áhyggjur okkar sem eldri erum af börnunum og nethegðun þeirra er kannski meira byggt á þekkingar eða skilningsleysi okkar en nokkuð annað. Fram kemur að flestum er fullljóst hvaða hættur leynast á netinu og hegða sér í samræmi við það. Eins og í raunheimum þá er mikilvægast sem foreldrar barna geta gert er að ala þau upp þannig að ýtt sé undir sjálfvirðingu þeirra og að þeim sé kennt hvað skal varast. Og láta þeim það svo eftir að nýta þá þekkingu sem foreldrar miðla til barna sinna og að sjálfsögðu að fylgjast með hvað þau eru að gera. Ekki endilega til að fylgjast með þeim til að vernda þau (þó að það sé mikilvægt), heldur líklega mikilvægara til að halda samskiptum milli foreldra og barns góðum. Svona svipað og að fylgjast með hvað þau eru að gera í raunheimum. Á sama tíma er þó gott að takmarka tíma barnanna í tölvunni svo þau séu nú líka eitthvað úti við.

Góður punktur hjá krökkunum með að hlaða niður tónlist og öðru efni ekki vegna þess að þau vilja gera eitthvað rangt heldur af því að öðrum kosti hefðu þau ekki aðgang að þessu efni vegna þess hve dýrt það er.

Nethegðun barna svipuð um alla Evrópu

Auðvitað

Það gefur sig nú sjálft að hennar ógæfa getur ekkert haft með hana sjálfa að gera enda viljalaust verkfæri í höndum foreldra sinna. Alltaf er gott að geta firrað sig ábyrgð á eigin gjörðum og kennt öðrum um. Vinsælt er að kenna mæðrum um allt og virðist sérstaklega vinsælt sjónarhorn í sálfræði. Kannski ætti ég að prófa þetta næst þegar mér verður eitthvað á.  

Ógæfa Lindsay Lohan sögð foreldrum hennar að kenna

Oforðanotkun

Nú ætla ég aðeins að fá útrás fyrir smá pirring. Það fer ferlega í taugarnar á mér hve dramatísk orð margir nota. T.d. að nota orð eins og mannréttindabrot um það að Akureyrarbær leyfði ekki 18-23 ára fólki að tjalda um verslunarmannahelgina. Þetta er ekki mannréttindabrot þó að hér sé um mismunun að ræða. Vissulega var þetta heimskuleg ákvörðun bæjarstjórnar Akureyrar og getur jafnvel varðað við lög. Að kalla þetta aftur á móti mannréttindabrot gerir lítið úr raunverulegum mannréttindabrotum. Að vera settur í fangelsi vegna stjórnmálaskoðana sinna, að vera neitað um meðferð við HIV, að vera pyntaður í fangelsi, o.s.frv. eru mannréttindabrot en ekki það að mega ekki tjalda á ákveðnu tjaldsvæði.

Nú get ég hætt að vera pirraður í bili.

Markó

Þar sem eitthvað virðist vera af kattafólki hér þá er kannski við hæfi að maður birti nokkrar myndir af mínum litla ketti, Markó. Ég kem kannski síðar með myndir af fiskabúrunum mínum.